2 февральыште С.Г. Чавайн лÿмеш национальный библиотекыште поэтесса Людмила Володинан «Йöратымашын позывнойжо-влак» усталык касше эрта.

Людмила Володина Йошкар-Олаште шочын, Н. Крупская лÿмеш МГПИ-н историй ден филологий факультетшым тунем пытарен, литературым туныктен, библиотекым вуйлатен, радиошто корреспондент лийын, ик заводышто кадрым ямдылыме пöлкаште, министерствысе увер пöлкаште тыршен, профсоюзышто пресс-секретарь лийын.

Пашам ыштымым чарнымеке, тудын у шÿлыш почылтын – поэзий деке шÿмаҥын. 2006 ийыште поэтессын «В ритме сердца» икымше почеламут сборникше савыкталтын, 2008 ийыште – «Планета нежности», 2009 ийыште «Крылья цвета пламени» сборник-влак. Поэтессын почеламутшо-влакым шым альманахыште савыктыме.

Шкерте огыл Людмила Володина шке пашаже-влакым Интернетыште поэтический сайтлаште савыкташ тÿҥалын. Ты сайтыш шукын пурат, Ятырын авторын почеламутшо нерген сай шомакым гына ойлат, сем аранжировкым ыштат да, мурым возен, гитар почеш шергылтарат.

Усталык касыште автор шкенжын у сылнымут сакажым лудеш. Тыгак Моско, Киев, Алма-Ата, Воронеж гыч исполнитель-влакын йоҥгалтарыме муро запись-влак йоҥгаш тÿҥалыт.

С.Г Чавайн лÿмеш библиотекын маркетинг пöлкаже.
«Кугарня» газетын пашаеҥже Ирина Степанова кусарен.