Эртыше шуматкечын Марий Эл Республикысе Национальный тоштерыште «Руш сылнымут клуб» Российысе мер организацийын – «Стихи.ру» ден «Проза.ру» порталлаште шке произведенийлаштым савыктыше литератор-влакын коммерческий огыл сылнымут ушемыштын шукерте огыл чумырымо регионысо пöлкажын презентацийже эртен.

Руш сылнымут клуб – тиде Российын тÿрлö олаж ден регионыштыжо 70 утла пöлка. Организацийын порталлаштыже 500 тÿжем наре авторын лаштыкшым ыштыме, 10 миллион утла прозо ден поэзий произведенийлам савыктыме. Тыштак талантан возышо-влакым кычалыт да нунын пашаштым калык коклаш шараш полшат.

Йошкар-Оласе самырык поэт, Руш сылнымут клубын мемнан регионысо пöлка правленийжым вуйлатыше Андрей Шурыгин коллегыже-влаклан у организацийын цель ден задачыже, ончыклык планже нерген каласкален. Тудо Марий Элысе тÿҥалше да опытан автор-влакым пырляшке ушнаш ÿжын.

- Клуб пöлкан тÿҥ цельже – мемнан регионышто талантан самырык автор-влакым кычалаш да нунын возымыштым кызытсе у информационный технологий йöн дене калык коклаш чотрак шараш. Ме моло организаций дене ваш келшаш, оҥай усталык проект дене пашам ышташ ямде улына, - каласен Андрей Шурыгин.

Презентаций мучаште чылан чайым йÿыныт. Самырык поэт-влак вашла шке почеламутыштым каласкаленыт, каҥашеныт.

Марий Эл Республикысе тÿвыра министерствын пресс-службыжо.
«Кугарня» газетын пашаеҥже Ирина Степанова кусарен.