31 январьыште коми драматург Алексей Поповын пьесыж почеш шындыме «Эх, кушто ӱдырым муаш?» спектакльын премьерышкыже мемнан театрыш Коми Республика гыч уна-влак толыт.

Театрын фойештыже Коми Республика нерген фотовыставка лиеш. Туштак уна-влак шкешт дене савыктен лукмо книгам да моло сатум ужалат. Спектакль деч ончыч ончаш толшо калыкым «Сипертас» фольклор ансамбль шке мастарлыкше дене куандара.

Делегацийыште Коми Республикын национальный политика министрже Г. Габушева; национальный политика министерствын национально-культурный да религиозный ушем-влак дене пашам ыштыме шотышто отделын начальникше П. Габов; драматург, пьесын авторжо, Россий Федераций культурын сулло пашаеҥже, Коми Республикын сулло пашаеҥже, Кугыжаныш премийжын лауреатше А. Попов; тудын чыла пьесыжым руш йылмыш кусарыше, «Коми му» газет редакций» республикыште коми йылме дене савыкталтше изданий-влак холдингын пашаеҥже Л. Попова; тиде холдингын директоржо да тудын алмаштышыже Н. Быковская ден Г. Холопова; Корткеросс район, Нившера селасе «Сипертас» фольклор коллектив (тудым М. Попова вуйлата) да «Юрган» Коми республиканский телевизионный компанийын кок пашаеҥже лийыт.

М. Шкетан лÿмеш Марий кугыжаныш драме театр.