19 июньышто Республикыштына "Агавайрем" ден "Пеледыш пайрем" эртеныт. Тумер отышто Юмылан пелештыме деч вара, погынышо калык тӱрлӧ модыш дене ӱчашен таҥасен, самырык-влак лӱҥгалтыш дене лӱҥгалтыныт.

Йошкар-Олашке чыла районла гыч да тӱрлӧ регионла гыч делегаций-влак "Пеледыш пайремым" пайремлаш погынен толыныт. Нуно чылан, Ленин лумеш ДК гыч тӱҥален, колонна дене площадь марте ошкылыныт. Шкетан лӱмеш театр ончылно погынышо калыкым артист-влак вашлийыныт. Оласе администрацийын саламлымаш мутышт деч вара концерт тӱҥалын.

Умбакыже пайрем тӱвыра паркыште шуйнен. Удмурт, Пошкырт, Татарстан республикыла гыч да Свердловс ден Нижегородской область гыч толшо коллектив-влак шке сылне мурымышт да куштымышт дене калыкын кумылыштым нӧлтеныт.

Йоча-влаклан лӱмын тӱрлӧ модышым ямдылыме. "Шокто гармонь" йоча ансамбль ден 13 номеран йочасадын икшывыже-влак изи концертым ончыктеныт.

Спорт деке шӱмаҥше-влаклан кум тӱрлӧ ӱчашымаш конкурсшто шке куатыштым тергаш темлыме. Тиде гирьым нӧлтымаш, армспорт да черемис кучедалмаш. Сеҥыше-влаклан шергакан пӧлекым кучыктымо.
"Марий касыште" калык гармонь почеш мурен-куштен, чонжым лывыртен. "Гармончо" конкурсышко ушнышо-влак шке мастарлыкыштым ончыктеныт.

А кастене "Пеледыш пайремым" Марий эстрадын мурызыжо-влак концер дене мучашленыт.

Марий тÿвыра рÿдер.