Кажне кечын 6 шагат эрдене Марий Эл Радио у кечым пырля вашлияш ÿжеш, да 23 шагат йÿдым ныжыл марий муро дене омо помышышко ужата. Тыге ынде 5 ий. 2005 ий 1 июльышто тудо «Поро эр, Марий Эл» шомак дене калык деке лектын.
А ынде «Мыланна - 5 ий!» манеш. Тиде кечымак «Марий Эл Радион» шочмо кечыжлан шотлыман. Марий Эл Радио - тиде марий муро, нӧлталалтше кумыл, паша кече, весела каныш да чолга вӱдышо-влак! Палемдыман, вӱдышӧ-влак - Наташа Пушкина, Ирина Якаева, Марина Глушкова, Александр Кожевников, Сергей Карпов Олык Ипай лӱмеш премийын лауреатше улыт. Радиовӱдышӧ радамышке тыгак Володя Матвеев, Анна Левагина да Вадим Протасов ушненыт.
«Марий Эл Радион» эфирыштыже тӱрлӧ темылан передача-влак йоҥгат. Мутлан, «Марий йӱла», «Марий географий», «Мыскара», «Пӧрьеҥ модыш», «Ӱдырамаш тӱня», «Тачысе йодыш», «Поэтъял» «Хит-парад» да моло программе-влак. Тыгак тыште тӱрлӧ модыш, конкурс да «Мурпӧлек» саламлымаш передаче. Радиом колыштшо-влакым келшыше сем денат кунадарат, тидланже сем редактор Андрей Чемышев Марий Элысе, тыгак пошкудо кундемлаште илыше марий мурызо-влак дене пашам ыштен, пырчын-пырчын мураршашым пога. Фондыштыжо 3 тÿжем утла муро уло.
Тыгак «Марий Эл Радион» уста коллективше радиом колыштшо-влаклан öрыктарыше, ойыртемалтше концертым ончыкта. Черетан кугу концерт «Строитель» стадионышто лиеш. Сÿрем тылзын пытартыш шуматкечынже шочмо кечым пырля эртараш ынде йӱлаш пурен. Тений тудо 31 июльлан логалын. 3-4 тÿжем еҥым, мурсем тÿням, «Марий Эл Радиом» пагалыше да аклыше-влакым ик касыште пырляшке уша. Концертыште вӱдышӧ-влак эреак ӧрыктарат. Мутлан, теве ӱмаште радиовӱдышӧ-влак стадионышко вучыдымын Мерседес машина дене кудалын пуреныт. Концерт годым кавашке чоҥештыше кӧгӧрчен ден дирижабль-влакым эре от уж.
Марий Эл радион концертше чонышко куаным пурта, ласкалык дене пойдаралтеш. Вет кажне шомак, ошкыл, койыш тыматле, ныжыл улыт. Тыге вӱдышӧ-влак шке поро кумылышытым, калыкым йӧратымыштым ончыктат. «Марий Эл радио» эше ик гана пеҥгыдын ойла: «Марий калык илыш дене тӧр кайышаш, нимо дене шеҥгелан кодшаш огыл!»
А «Мыланна - 5 ий!» концерт мо дене ойыртемлтше лиеш? Тидлан 31 июльышто «Строитель» стадионышто вашмутым пуа. Пайрем концерт 18 шагатат 30 минутлан тӱҥалеш. А концерт деч шагат ончыч марий сем почеш куштымаш лиеш. «Чон оҥгыр», «Кугезе кумыл», «Ший аршаш» ансамбль-влак пайрем шӱлышым пуртат. Тыгак каласыман, «Марий Эл Радион» йӱлаже почеш, шочмо кечылан пӧлеклалтше концертыште у мурызо дене палымым ышташ. 31 июльышто «Марий Эл Радион» вӱдышыжӧ-влак йӧратыме да пагалыме шочмо калыклан чон гыч лекше пӧлекым ямдыленыт.
«Марий Эл Радион» ешыже.
