31 июльышто «Марий Эл радио» 5 ияш лÿмгечыжым палемден. «Строитель» стадионышто 5 тÿжем утла еҥ погынен. Концертыш толшо марийжат, рушыжат, суасшат марий сем почеш мурен, куштен, мурызо да радиовÿдышö-влакым куан кумыл дене вашлийын. А «Марий Эл Радион» уста коллективше шочмо калыкшылан пöлекым ыштен.

Чонлан лишыл муро-влак нерген монден огыл. Мутлан, Вероника Корчемкина, «Лӱҥгалтыш», «Вис-вис» ансамбль-влак концертлан поснак вес тӱсым пуэныт. Тыгак у шӱдыр-влакым ужаш лийын. «Марий Эл Радион» ончычсо вӱдышыжӧ Рауль Гарифуллин весела такмак-влак дене калыкым тавалташ таратыш. Шокшо игечым ончыде «Кугезе кумыл», «Ший аршаш», «Чон оҥгыр» ансамбльын участникше-влак марий вургемым чиен, мурен-куштен, веселитлен жапым эртарышт. Сценышке икганаште 8 гармоньчо лектын! Тыгай але лийын огыл. Советский район гыч «Мураршаш» ансамбль калыкым ӧрыктарыш. Каласыман, концерт программым чаткан шонен ямдылыме. Мурын куатшым, ямжым шижаш манын номер-влак посна куштымаш-влак дене сӧрастаралтыныт.

Тыгак тул, йӱк полшымо дене гына серлагыме огыл. Концерт годым машина да фаетон дене вӱдышӧ-влак кудалын толыныт. Тыгак шуко муро йоҥгымо годым тудын содержанийжым почын пуашлан режиссерын пашаже шижалтын. 5 ияш пайремыш калык шыҥ-шыҥ погынен. Тугеже «Марий Эл радион» пашажым аклат, радиом колыштыт. Каласыман, Ирина Якаева, Сергей Карпов, Андрей Чемышев, Валерий Мочаев, Наташа Пушкиналан тӱвыра министерстве да виктер суаптарым кучыктеныт. «Марий Эл Радион» вуйлатышыжлан Александр Курмузаковлан Марий Эл Республикын сулло журналистше чап лӱмым пуэныт.

«Марий Эл Радион» ешыже.