22 августышто Угарман кундемыште Тонкино районышто регионгокласе йоча муро "Ший оҥгыр" конкурс эртен. Чот почеш тений нылымше гана. Тушко марий эстрада мурым йоҥгалтарыме дене 7 гыч 18 ий марте йоча-влак чумыргеныт. Тиде Угарман кундемын 3 районжо, Нижний Новгород ола гыч да тыгак Марий кундем гыч участник-влак лийыныт.

Дуэт дене мурымаш, калык мурым йоҥгалтарымаш, тыгак кусарыме йоча муро да марий композитор-влакын мурыштым конкурсышто шергылтареныт. Марий кундем гыч Данил Кораблев, Юлита Зуева, Саша Степанова, Эрнест да Эльза Александровмыт да коллектив вуйлатыше Наташа Пушкина миеныт.

Марий Эл республик гыч самырык мурызо-влак тÿрлö номинацийыште, ийготым шотыш налын, 1 степенян диплом дене палемдалтыныт. Гран-прим Угарман кундем гыч участницалан Маша Охотниковалан пуэныт. Тудо "Рвезе каен Ленинградыш" мурым йоҥгалтарен.

Каласыман, тыгай мероприятий-влак йоча-влаклан марий мурын ямжым, куатшым аклаш туныктат. "Марий йоча муро" тема шонаш таратыше йодыш-влакым тарвата. Ты йодыш-влаклан вашмутым, ак шомакым "Марий Эл Радион" эфирышкыже колыштын кертыда. Тыгак йодыш, темлымаш дене ушнаш кумыл уло гын, 8 917 719 0000 смс-форумышко возыза але 63-04-66 телефон дене йынгыртен кертыда. Программа эфирышке эрла (24 августышто) 15 шагатлан лектеш.

"Марий Эл Радио".