Марий книга савыктыш у книгам темла. Тиде — лудшын пагалымашыжым сулен налше да сылнымутышто шкенжын ойыртемалтше корныжым тошкышо писатель Геннадий Алексеевын "Куку муро ойган" повесть ден ойлымаш-влак сборникше.

Геннадий Валерианович Алексеев тений 17-ше февральыште 55 ияш лÿмгечыжым палемдыш. Тудо Морко районысо Эҥерсола ялыште кресаньык ешеш шочын-кушкын. Йошкар-Оласе 1-ше номеран музыкально-художественный школ-интернат да Октябрьский кыдалаш школ деч вара МарГУ-н историко-филологический факультетшым тунем лектын. "Ямде лий", "Марий коммуна" газет, "Марий Эл учитель", "Туныктышо", "Ончыко" журнал редакцийлаште тÿрлö должностьлаште тыршен. Марий книга савыктышыште директорлан ыштен. 2000 ий гыч — священнослужитель.

Геннадий Алексеевын сылнымут корныжым кум ужашлан шелаш лиеш: тÿҥалтыште тудо поэзий аланыште шкенжым ончыктен, вара прозо дек шÿмаҥын, 2000 ий гыч духовно-просветительский шÿлышан литературым кусарымаште тырша.

У книгашке кок повесть ден ойлымаш-влак пуреныт. Персонажышт — марий ялыште илыше тыглай еҥ-влак — авторлан пеш палыме да лишыл улыт. Нунын шÿм-чон поянлыкыштым, койыш-шоктышыштым, илыш умылымашыштым аклаш писатель оҥай сюжетым, проста да лывырге йылмым кучылтеш.

Марий книга савыктыш.